Министрликтин маалымат кызматынын маалыматына ылайык, Кендирбаева борбордун имаратын, анын ичинде жумушчу кабинеттерин жана тегерегиндеги аймакты карап чыкты. Визит учурунда ал мекеменин жамааты менен жыйын уюштурду.
Жыйында борбордун кызматкерлеринен тышкары министрликтин тиешелүү башкармалыктарынын өкүлдөрү жана №94, №91, №20 кесиптик лицейлеринин, ошондой эле Кыргыз билим берүү академиясынын өкүлдөрү катышты.
Жолугушуу учурунда борбордун ишмердүүлүгү талкууланды, министр иштин сапатын жакшыртууга багытталган бир катар тапшырмаларды белгиледи. Бул тапшырмалардын катарына: шахмат секциясын киргизүү боюнча так план түзүү, мугалимдер үчүн комплекстүү методикалык камсыздоону даярдоо, мугалимдердин квалификациясын жогорулатуу, окуучулар жана мугалимдер үчүн спартакиадаларды уюштуруу, ошондой эле санариптик көндүмдөрдү өнүктүрүү кирет.
Кендирбаева борбордун имараты капиталдык оңдоону талап кыларын белгилеп, бул маселе боюнча тиешелүү мамлекеттик структураларга расмий кат жөнөтүүнүн зарылдыгын айтты.
«Биздин өлкөдө жоокердикке даярдык жана физикалык культура боюнча мугалимдерди даярдоого арналган борбор иштеши керек. Анын стратегиясын, саясатын жана зарыл көрсөтмөлөрдү иштеп чыгуу маанилүү. Бул бала бакчаларды жана билим берүү мекемелерин камтышы керек. Ошондой эле, интеллектуалдык жана улуттук оюндар аркылуу кичинекей балдарды өнүктүрүү үчүн методикаларды түзүү зарыл», - деп кошумчалады министр.
Мындан тышкары, министр №20 кесиптик лицейдин окуу корпусун, аймагын жана жатаканасын карап чыкты, ошондой эле окуу процессине катышты. Башкарууга билим берүү процессин жакшыртуу боюнча сунуштар берилди.
