Бишкек шаардык мэриясынын маалымат кызматы тарабынан берилген маалыматка ылайык, учурда курулуш алаңында ички оңдоп-түзөө иштеринин жүрүп жатканы, санитардык жайларда кафель плиткаларынын төшөлүп жатканы жана имараттын фасадына байланыштуу иштер жүргүзүлүп жатканы маалымдалууда.
Проекттик документацияга ылайык, жалпы аянты 2927 чарчы метрди түзгөн эки кабаттуу имарат курулууда. Курулуп жаткан мекеме жайгашкан жер тилкеси 0,8 гектарды ээлейт. Аймакта 9 оюн аянтчасы каралган жана бүт периметр боюнча 2,5 метр бийиктикте металл тосмо орнотулат.
Имараттын биринчи кабаты алты топ үчүн уктоочу жана оюн бөлмөлөрүн, буфет, ашкана, медициналык кабинет, санитардык жайлар, ошондой эле кызматкерлер үчүн жайлар жана техникалык бөлмөлөрдү камтыйт. Экинчи кабатта дагы алты топ үчүн уктоочу жана оюн бөлмөлөрү, жетекчинин кабинети, музыкалык жана физкультура сабактары үчүн залдар, ошондой эле складдык жана кошумча жайлар жайгашат.
Курулуш иштерин ОсОО «ПСО Адис Строй» подрядчысы жүргүзүүдө.
