Билим министри Таласта «Акылман» президенттик лицейинин курулушу менен таанышып чыкты

Билим министри Догдуркүл Кендирбаева Талас облусуна жумушчу сапарынын алкагында Талас шаарында курулуп жаткан президенттик «Акылман» лицейи менен таанышып чыкты. Бул тууралуу министрликтин басма сөз кызматы билдирди.

Кендирбаевадын пикири боюнча, «Акылман» лицейи улуттук кадрларды даярдоо жаатында «маанилүү кадам» болуп саналат.

Лицей 12 жылдык билим берүү программасын кесиптик багытка басым жасап ишке ашырат. Окуу жайдын үчүнчү кабатында сантехник, сварщик жана ашпозчу сыяктуу кесиптер боюнча окуу үчүн атайын класстар ачуу пландалууда. Бүтүрүүчүлөр сертификаттарды алышат, бул алардын жумушка орношуу процессин жеңилдетет.

Жаңы билим берүү мекемесинин жалпы аянты 3 гектарды түзөт, долбоордун алкагында 920 окуучуга ылайыкташкан мектеп жана 200 орундуу бала бакча куруу каралган.