Ал учурдагы отчеттордо смогдун жарандардын ден соолугуна кандай таасир эткени жетиштүү деңгээлде чагылдырылбаганын белгилеп, астма жана аллергиялык реакциялар сыяктуу оорулардын өсүшүнө, айрыкча балдар жана кары адамдар арасында, көңүл бурду.
Алимжанова ошондой эле, саламаттыкты сактоо министрлиги тарабынан аралык комиссиянын алкагында кандай чаралар көрүлгөнү жана бул уюм смогдун калкка тийгизген кесепеттерин кандай баалаарын сурады.
Депутат маселени талкуулоодо негизинен Бишкек жана Ошко көңүл бурулаарын, ал эми башка аймактарда абалдын дагы да оор болушу мүмкүн экенин белгиледи. Ал аймактарда көмүр кеңири колдонулуп, газдаштыруу жок экенин, бул болсо оорулардын көбөйүшүнө алып келерин баса белгиледи.
«Аймактарды унутпашыбыз керек. Бизге келген бейтаптардын көбү ошол жактан келип, кийин Бишкекте дарыланууга туура келет, ал жерде оорукана орундарынын жетишсиздиги байкалууда», - деди депутат.
