Ош облусунун ИИБинин УОБДД пресс-кызматы тарабынан тастыкталган маалыматка ылайык, окуя 26-февралда 20:10да Т.Зулпуев айылдык округунун аймагында орун алган. Жол кырсыгынын натыйжасында эки «Daewoo Matiz» үлгүсүндөгү унаа кагышып, андан кийин алардын бири «Honda Fit» жана «Mercedes-Benz» унааларына урунган.
Окуянын натыйжасында «Daewoo Matiz» унаасынын айдоочусу жана «Honda Fit» унаасынын эки жүргүнчүсү жабыркаган. Алар Ноокат районунун ооруканасына медициналык жардам алуу үчүн жеткирилген.
Учурда жабыркагандардын абалы жана окуянын жагдайлары боюнча маалымат такталып жатат.
