Шектүүлөр кармалды жана ИВСке жайгаштырылды
20-февралда Бишкектин Свердлов районунун ИИБине 1955-жылы туулган Л.К. аттуу жаран алдамчылык боюнча арыз менен кайрылган, деп билдирет Бишкек шаардык ИИБи.
Ал белгисиз адамдар, Мамлекеттик улуттук коопсуздук комитетинин (МУКК) кызматкерлери болуп өздөрүн тааныштырганын айтып, 12 миллион сом акчасын алдап алганын билдирди.
Бул факт боюнча Кыргыз Республикасынын Кылмыш кодексинин 209-беренеси «Алдамчылык» боюнча кылмыш иши козголду.
Оперативдик-издөө иш-чараларынын натыйжасында шектүүлөр аныкталып, кармалды: 2007-жылы туулган Т.К., 2006-жылы туулган А.М. жана 2003-жылы туулган А.К.
Бардык кармалгандар Бишкек шаардык ИИБнин убактылуу кармоо жайына жайгаштырылды.
