Ушул жылдын январь айында Австралиянын Виктория штатында катуу орман өрттөрү болуп, фермерлер 40 миңден ашык малын жоготушту. Өрттөн жабыркаган аймактын аянты 110 миң гектардан ашты, деп билдиришти жергиликтүү маалымат каражаттары Виктория штатындагы фермерлер федерациясынын (VFF) маалыматына шилтеме берип.
Федерациянын маалыматы боюнча, айыл чарба секторуна келген зыян 20 миллион австралия долларынын үстүндө бааланууда.
Эң көп жабыркаган топ - койчулар болду: алдын ала маалыматтар боюнча, бул өрттөрдүн натыйжасында 32 миңден ашык кой өлдү.
Жалпысынан өлгөн жаныбарлардын саны 41 миң 336га жетти, анын ичинде үй канаттуулары, ири мүйүздүү мал, эчкилер жана аттар бар. Өрт ошондой эле айыл чарба техникаларын, имараттарды, чоң аянттагы тосмолорду жана жайыттарды, ошондой эле бакча өсүмдүктөрүн жана карагай плантацияларын жок кылды.
VFFнин президенти Бретт Хоскинг зыяндын акыркы баасы дагы бүтпөгөнүн белгиледи. «Чыныгы жоготууларды так баалоо үчүн жылдын көп бөлүгү талап кылынат», - деп айтты ал.
Ошол эле учурда өрттөр штаттын бир нече райондорунда уланууда, бул жабыркаган фермерлерге жетүүнү жана зыянды баалоону кыйындатууда.
