Прокурордун пикири боюнча, күчтүү жана өнүккөн мамлекет куруу үчүн жаш муундун — өлкөнүн келечегинин — физикалык, интеллектуалдык, моральдык жана руханий жактан толук өнүгүшүн коргоо жана камсыздоо талап кылынат. Башкача айтканда, балдардын укуктарын коргоо мамлекеттин эң маанилүү милдеттеринин бири болуп саналат. Бул шарттарда прокуратура органдары курак жетпегендердин укуктарын жана мыйзамдуу кызыкчылыктарын коргоо боюнча негизги орунду ээлейт. Бирок, муну менен бирге, айрым региондордо өспүрүмдөр тарабынан жасалган кылмыштар катталып жатат.
Ошентип, Ат-Баши районунун аймагында 2025-жылы курак жетпегендер тарабынан 6 кылмыш жасалган. Тергөө иштеринин жыйынтыгы боюнча 2 кылмыш иши сотко жөнөтүлдү, 3 иш боюнча өндүрүш токтотулду, дагы 1 иш боюнча баланы кылмыш адилеттиги системасынан чыгаруу максатында алдын ала өндүрүштү токтотуу боюнча негиздүү чечим кабыл алынды. Чечим Кылмыш-процессуалдык кодексинин 467-беренесине ылайык кабыл алынып, тиешелүү келишим түзүлдү, андан кийин курак жетпеген бала кылмыш адилеттиги системасынан чыгарылды.
Прокурордун маалыматы боюнча, бул бала биринчи жолу жеңил кылмыш жасаганда, сот тарабынан жазадан бошотулуп, пробациялык көзөмөл же мажбурлап тарбиялоо чараларын колдонуу аркылуу кылмыш адилеттиги системасынан чыгарылышы мүмкүн.
Курак жетпегендер тарабынан жасалган 6 кылмыштын 2си оор кылмыштарга, 4ү жеңил кылмыштарга жана азыраак кооптуу кылмыштарга тиешелүү.
Курак жетпегендерге карата жасалган кылмыштар боюнча 5 кылмыш иши козголгон. Тергөө жыйынтыгы боюнча 2 иш сотко жөнөтүлдү, 3 иш токтотулду.
Курак жетпегендерге карата жасалган 5 кылмыштын 2си оор кылмыштарга, 1и өзгөчө оор кылмышка, 2си жеңил кылмыштарга жана азыраак кооптуу кылмыштарга тиешелүү.
Жүргүзүлгөн анализ көрсөткөндөй, курак жетпегендер арасындагы кылмыштуулуктун негизги себептери ата-энелердин чет өлкөдө эмгек миграциясында болушу менен байланышкан тиешелүү көзөмөлдүн жоктугу, социалдык көйгөйлөр, өспүрүм (өтүү) курагы жана башка факторлор болуп саналат.
Ат-Баши районунун прокуратурасы, прокурор Айбек Шерматовдун маалыматы боюнча, курак жетпегендерге карата кылмыштуулукту азайтууга багытталган алдын алуу иштерин туруктуу негизде жүргүзүп келет.
