Америкалык бийликтен алынган маалыматка ылайык, Кыргызстан жараны 2025-жылы кармалган, ал эми 2026-жылдын 22-январында сот ага күнөө коюп, эркинен ажыратуу түрүндөгү жаза белгилеген.
КР ТИМи кармалгандан кийин дароо дипломатиялык өкүлчүлүктөр аркылуу жарандын менен байланыш орнотулганын жана ага керектүү консулдук жардам көрсөтүлгөнүн билдирди. Ведомство анын укуктарын эл аралык нормаларга жана АКШнын мыйзамдарына ылайык коргоо үчүн туруктуу өз ара аракеттешүү жүргүзүлгөнүн белгиледи.
Муну менен катар, жарандын аты-жөнү жана конкреттүү айыптоолор ачыкка чыгарылган жок. Бирок мурдагы маалымат булактарында Сергей Жарновников аттуу кыргызстандык АКШда үч жылга соттолгону тууралуу айтылган.
АКШнын Адилет министрлигинин маалыматына ылайык, Сергей Жарновников Кыргызстан аркылуу Россияга 1,5 миллион доллардан ашык суммадагы америкалык курал-жаракты мыйзамсыз экспорттоо менен алектенген. Сот материалдарына ылайык, ал 2020-жылдын март айынан бери Бишкекте катталган компаниясы аркылуу курал-жарак жана ок-дарыларды контрабанда менен алып өткөн.
Маалыматтарга караганда, эркек киши 2025-жылдын январында жубайы менен АКШга келип, курал-жарак көргөзмөсүндө кармалган. Кээ бир маалыматтар боюнча, анын АКШда туруктуу жашоого укугу жок болчу, жана соттун чечими менен жаза мөөнөтүн өтөгөндөн кийин кайра мекенине депортацияланат.
Сергей Жарновниковдун аты мурда Бишкектеги курал-жарак дүкөнүнө ээ болгону менен байланыштуу маалыматтарда аталган.
