Процесс судья Гектор Гонсалестин жетекчилиги астында өттү. Айыпталуучу АКШдан Россияга Кыргызстан аркылуу ок атуучу курал жана ок-дарыларды мыйзамсыз ташуу боюнча күнөөлүү деп табылды, алардын жалпы баасы 1,5 миллион доллардан ашкан.
Эскерте кетсек, С.Ж. АКШда туруктуу жашоочунун статусуна ээ эмес болчу жана жаза мөөнөтү аяктагандан кийин депортацияланат.
Тергөө маалыматтарына ылайык, С.Ж. Бишкекте курал компаниясына ээ болчу. 2020-жылдын март айынан баштап, ал шериктери менен биргеликте АКШнын Соода министрлиги тарабынан контролдонуучу ок атуучу куралды Американдан Россияга экспорттоону уюштуруп, ишке ашырган. Ал жалпы 1,5 миллион доллардан ашык суммадагы курал жана ок-дарыларды экспорттогон, анын ичинде Кыргызстанга курал жеткирүү үчүн америкалык компания менен 900 миң долларлык беш жылдык келишим бар. Экспорт лицензиясында Россияга кайра экспорттоого тыюу салынганы көрсөтүлгөн.
Анткен менен, ал АКШдан Кыргызстан аркылуу Россияга жарымавтоматтык винтовкаларды экспорттоону уланткан.
С.Ж.нын бир келишиминде ал Кыргызстан аркылуу башка америкалык компаниядан сатып алынган беш винтовканы кайра экспорттогон. Алардын экспорт лицензиясы да Кыргызстандан тышкары чыгарууга тыюу салган. Бул винтовкалар Россиянын снайперлери тарабынан, анын ичинде Украинадагы согуштарда колдонулган.
Мындан тышкары, бул иштин фигуранты америкалык ок-дарыларды Италия аркылуу Кыргызстанга, андан кийин Россияга мыйзамсыз кайра экспорттоого тартылган. Башка адамдар менен кызматташып, ал үчүнчү америкалык уюмдан 23 миң долларга 13 миң патронду заказ кылып, Италия аркылуу Бишкекке жеткирилген. Бирок лицензияда ок-дарылар Италиянын аймагында калууга тийиш экени көрсөтүлгөн жана алар мыйзамсыз чыгарылган. Бул ок-дарылар да Россиянын Украинага каршы конфликтинде колдонулган.
Эскерте кетсек, С.Ж. 2025-жылдын 24-январында Лас-Вегас шаарында, АКШнын жеткирүүчүлөрү менен жолугуп, Shooting, Hunting and Outdoor Trade (SHOT) Show көргөзмөсүнө катышып жатканда кармалган.
