Узгенде жөө адамдардын көпүрөсүнө чыгып кеткен айдоочуга 30 миң сом айып салынды

Узгенде шаарга кирген жердеги жөө жүргүнчүлөр көпүрөсүнө кирген айдоочуга 30 миң сом өлчөмүндө айып пул салынды. Бул тууралуу мэр Элдос Таев билдирди.

Бүгүн, 11-январда, Узген районунун жол кыймылынын коопсуздугун камсыздоо бөлүмүнүн кызматкерлери рейд өткөрүп, жөө жүргүнчүлөргө гана арналган көпүрөгө кирген эрежени бузган айдоочуну аныкташты.

Мэрдин маалыматына ылайык, эрежени бузган жаран А. М. 2009-жылы туулган. Анын айдоочулук күбөлүгү жок экендиги аныкталды. Учурдагы мыйзамга ылайык, автохулигандык үчүн ага 30 миң сом өлчөмүндө айып пул салынды.

Шаардык бийлик жарандарды жол кыймылынын эрежелерин сактоого чакырып, мындай бузулууларга каршы күрөшүү чаралары күчөтүлөрүн эскертишти.