Жакынкы Чыгыштагы кырдаалдын начарлашына байланыштуу Кыргызстандын жарандары үчүн умра — кичи хаджды аткаруу боюнча убактылуу чектөөлөр киргизилди. Бул тууралуу Кыргызстандын мусулмандар дин башкармалыгы (муфтият) маалымдады.
Муфтият тарабынан берилген маалыматка ылайык, 7-мартта ДУМКнын имаратында кеңейтилген жыйын өтүп, ага Тышкы иштер министрлигинин, Коопсуздук кеңешинин катчылыгынын, Президенттин алдындагы Дин жана этностор аралык мамилелер боюнча улуттук агенттиктин өкүлдөрү, ошондой эле Мамлекеттик жарандык авиация кызматынын, авиакомпаниялардын жана туристтик фирмаларынын кызматкерлери катышты.
Жыйында Жакынкы Чыгыштагы кырдаал талкууланып, Кыргызстандын мамлекеттик органдары тарабынан жарандардын коопсуздугун камсыздоо үчүн кабыл алынган чаралар каралды. Жыйындын катышуучулары учурдагы негизги милдет Кыргызстандыктарды коргоо экенин белгилешти.
Мындан тышкары, Саудия Аравиясындагы кыргызстандыктардын коопсуздугу, ошондой эле умрага барып, туруксуздук шарттарында чет өлкөдө калган жарандарды кайтаруу маселелери каралды.
Жыйындын жыйынтыгы боюнча Кыргызстандын жарандары үчүн умрага чыгуу убактылуу чектелип, кырдаал стабилдешкенге чейин туристтик компанияларга жана авиаперевозчиктерге ушундай сапарларды уюштуруудан баш тартуу сунушталды.
Кырдаалга жараша, Jazeera Airways, Flynas жана Air Arabia сыяктуу авиакомпаниялар токтотулган авиарейстерди калыбына келтирүү мүмкүнчүлүгүн карап жатышат.
Муфтият 3-марттагы кайрылуусунда кыргызстандыктарды Перс булуңундагы кырдаал нормалданганга чейин умрага баруудан убактылуу баш тартууга чакырган.
Тышкы иштер министрлигинин 2-марттагы маалыматына ылайык, Перс булуңунда болжол менен 22 миң кыргызстандык бар. Алардын ичинен 10 миңи Бириккен Араб Эмирлигинде, 800ү Катарда, 5 миңден ашыгы Саудия Аравиясында жана 100дөй Израилде, ошондой эле Кувейт, Бахрейн жана Иорданияда дагы миңдей кыргызстандык бар.
7-мартта президенттин басма сөз катчысы Аскат Алагозов Катарда калган 134 жаран 8-мартта Саудия Аравиясы аркылуу Кыргызстанга учуп кете аларын билдирди.
Мурда Бириккен Араб Эмирлигинен Бишкек жана Ошко 260 кыргызстандык жеткирилсе, Саудия Аравиясынан 210 жаран кайтарылган. Омандан дагы 85 кыргызстандык мекенине кайтып келишти.
АКШ жана Израилдин Иранга каршы аскердик операциясы 28-февралда башталды. Иран болсо, Израилге гана эмес, региондогу башка өлкөлөрдүн аймактарына да аба соккуларын уруп жатат.
Кыргызстанда умра — кичи хаджды аткаруу үчүн убактылуу чектөө киргизилгени тууралуу жазуу K-News’та пайда болду.
