Ош облусунда орнотууга пландалган 220 кВ кубаттуулугундагы «Исанова» подстанциясынын курулуш этапында дрондорду колдонуу менен маршруттук изилдөөлөр жүргүзүлүүдө.
«Бул методика аэрофотосъемканы жогорку тактык менен жүргүзүүгө жана электр линияларынын маршруту боюнча видеоматериалдарды жазып алууга мүмкүнчүлүк берет. Жыйналган маалыматтар 3D форматында иштетилет, бул жердин рельефин, техникалык өзгөчөлүктөрдү жана курулуш процессиндеги мүмкүн болгон кыйынчылыктарды так баалоого мүмкүнчүлүк берет», - деп тактады министрликтен.
Консультациялык кызматтар боюнча министрлик ирандык Monenco Iran фирмасы менен контракт түзүлгөнүн маалымдады. Экологиялык жана социалдык аспектилерге байланыштуу изилдөөлөр жана долбоорлоо MERCADOS ARIES INTERNATIONAL, S.A. консультанты менен биргеликте 2026-жылдын 27-февралынан 31-мартына чейин жүргүзүлөт.
«Дрондорду колдонуу маршруттарды так пландаштырууга, айлана-чөйрөгө таасирин алдын ала баалоого жана коопсуздук стандарттарын сактоону катуу көзөмөлдөөгө мүмкүндүк берет. Бул Кыргызстанда заманбап технологияларды колдонуу боюнча биринчи учур болуп саналат жана өлкөнүн энергетикалык долбоорлору үчүн жаңы багыттарды белгилейт. Натыйжасында, региондун электр энергиясын камсыздоо туруктуулугу жогорулайт жана жаңылануучу энергия булактарын интеграциялоо жакшыртылат», - деп кошумчалашты билдирүүдө.
Энергетика министрлиги ошондой эле 110 кВ напряжениеси бар жаңы аба линияларын эксплуатацияга киргизүү менен, Узгенде, Кара-Кульдже жана Кара-Сууда курулушу пландалган «Кара-Шоро», «Кара-Кульджа» жана «Каратай» подстанциялары «Исанова» башкы подстанциясына кошула турганын белгиледи. Жаңы аба линияларынын узундугу төмөнкүдөй болот:
- 110 кВ «Исанова – Кара-Кульджа» – 40 км
- 110 кВ «Исанова – Каратай» – 60 км
- Эки зымдуу 110 кВ «Исанова – Кара-Шоро» – 3 км
