Түркияга расмий визит учурунда Жогорку Кеңештин спикери Нурланбек Тургунбек уулу Түркиянын Улуу улуттук жыйынынын төрагасы Нуман Куртулмуш менен жолугушту.
Парламенттин маалымат кызматынын маалыматына ылайык, алгач кыскача жолугушуу өтүп, андан кийин сүйлөшүүлөр кеңири форматта улантылды.
Сүйлөшүү учурунда эки өлкөнүн саясий, экономикалык жана маданий байланыстарын чыңдоо темалары каралды, парламенттер аралык кызматташууга өзгөчө көңүл бөлүндү.
Тургунбек уулу президент Режеп Таййип Эрдогандын 2024-жылы Кыргызстанга болгон мамлекеттик визити жаңы стратегиялык өнөктөштүктүн барагын ачкан маанилүү окуя экенин белгиледи. Ал Садыр Жапаров менен Режеп Таййип Эрдоган ортосундагы бекем бир туугандык мамилелер кызматташтыктын тереңдеши үчүн ишенимдүү негиз болуп кызмат кылат деп айтты.
Жолугушуу учурунда спикер парламенттер аралык диалогду кеңейтүү маселелерин көтөрүп, комитеттер жана достук топтор деңгээлинде өз ара аракеттенүүнү улантуунун зарылдыгын баса белгиледи.
Мындан тышкары, ал Кыргызстан менен Түркиянын ортосундагы товар жүгүртүүнү 5 миллиард АКШ долларына чейин жогорулатуу максатын эске салып, түрк бизнесмендерин энергетика, кен казуу жана өнөр жай сыяктуу негизги тармактарга инвестиция салууга чакырды.
Тургунбек уулу өлкөлөр ортосундагы визасыз режимди 90 күндөн 180 күнгө узартуу боюнча демилгени да көтөрдү. Ал быйыл Кыргызстан VI Дүйнөлүк көчмөндөр оюндарына Түркиянын спортчулары жана расмий өкүлдөрүн көрүүгө кубанычта болорун кошумчалады.
Спикер билим берүү кызматташтыгынын мааниси тууралуу өз оюн бөлүшүп, бул тармактагы өнөктөштүк башка өлкөлөр үчүн үлгү болуп берерин белгиледи. Анын ичинде ал "Манас" университетин атап, жакынкы келечекте ал дүйнөдөгү 500 мыкты университеттин катарына кирет деп ишенерин билдирди.
Куртулмуш болсо Түркиянын кыргыз эли менен бардык тармактарда биргелешип иштөө кызыгуусун тастыктады. Ал саламаттык сактоо жана билим берүү тармагындагы кызматташтыктын өнүгүшүн приоритеттүү багыттар катары белгилеп, азырынча бир катар ийгиликтүү биргелешкен долбоорлор бар экенин айтты.
