Депутаттар аймактардагы жолдордун абалын жакшыртуунун маанилүүлүгүн белгилешти. Атап айтканда, Нарын—Баетов жолунун курулушун аяктоонун зарылдыгы талкууланды.
Транспорт министринин орун басары бул маршруттун жалпы узундугу 112 км экенин, анын ичинен 80 км аяктоону талап кылып жатканын билдирди. Бул жылы эки курулуш компаниясы менен келишимдер түзүлүп, биринчи асфальт катмарынын төшөлүшү пландалууда.
Ошондой эле депутаттар Ачы, Шатрак, Соку-Таш, Ак-Терек жана Алчалуу айылдарын Кызыл-Тууй айыл өкмөтүнө байланыштырган жолдун оңдолушун кайрадан баштоону катуу сунушташты. Министрликтин маалыматы боюнча, бул участоктогу иштерди ушул жылы аяктоо пландалууда.
Мындан тышкары, Суу ресурстары, айыл чарба жана кайра иштетүү өнөр жайы министрлигинен ирригациялык системаны жакшыртуу, калкты ичүүчү суу менен камсыздоо жана капиталдык курулушту контролдоо боюнча чаралар тууралуу маалымат угулду. Депутаттар талаа иштеринин башталышына чейин ирригациялык объектилерди убагында даярдоонун маанилүүлүгүн белгилешти.
Депутаттык топтун жетекчиси Нурбек Сыдыгалиев жол жана ирригация курулушу боюнча инфраструктураны өнүктүрүүнүн региондордун экономикалык өсүшүнө жана транспорттук жеткиликтүүлүгүнө түздөн-түз таасир этерин баса белгиледи.
