Компаниянын маалыматына ылайык, кендин эксплуатациясы үчүн капиталдык инвестициялар болжол менен $170-200 миллионду түзөт.
Республика бюджетине которулуучу салыктар $650-700 миллионду түзөт.
ЖАКта белгилешкендей, көрсөтүлгөн финансылык болжолдор учурдагы алтындын базар бааларына негизделген, ошондой эле 600 жумушчу орду түзүлөт.
Тоголокту иштетүү үчүн лицензия 2023-жылдын августунда алынган, андан кийин запасдарды тастыктоо үчүн активдүү геологиялык изилдөөлөр башталган. Бул иштер «Кумтор Голд Компани» ЖАКтын финансылык колдоосу менен жүргүзүлүүдө.
Учурда Ак-Шийрак айылынан 35 чакырымдык электр өткөргүч линияларын тартуу боюнча даярдык иштер жүргүзүлүүдө. Сары-Бель аймагында 10 мегаватт кубаттуулуктагы подстанция жана жылына 500 миң тонна руда өндүрүүчү алтынды алуу фабрикасын куруу пландалууда.
Ошондой эле Уч-Кошкон айылынан кенге чейин техникалык жолду жана Кайчи дарыясынан жаңы көпүрөнү куруу каралган.
Тоголокто толук масштабдагы кен казуу иштерин ушул жылы баштоо пландалууда. Алгачкы руда 2026-жылы казылып алынат, ал эми биринчи Доре сплавы 2027-жылы чыгарылат.
Кенди иштетүү долбоору 16 жылга эсептелген жана эки этапта ишке ашырылат. Жалпы 16 тоннанын үстүндө алтын казып алуу пландалууда:
- биринчи этапта — 6 тонна алтын ачык ыкма менен жети-сегиз жылдын ичинде;
- экинчи этапта — 10 тоннанын үстүндө кымбат металлды жер астында.
