Депутат Болотбек Борбиев халал-сертификациянын тамак-аш продуктуларынан тышкары башка тармактарды да камтый турганын айтып, өлкөдө киргизилген конкреттүү стандарттар тууралуу суроо узатты.
«Халал-сертификация ар кандай тармактарды, тамак-аш продукциясын гана эмес, камтыйт. Кыргызстан Ислам өлкөлөрүнүн стандарттар жана метрология институтунун (SMIIC) мүчөсү, анда биздин өлкөдө кандай стандарттар киргизилген?» — деп кызыкты.
Экономика жана соода министрлигинин алдындагы «Халал-индустрияны өнүктүрүү борборунун» жетекчиси Алмаз Кайырбеков 2016 жана 2017-жылдары Кыргызстан SMIIC боюнча үч стандартты киргизгенин билдирди.
«2016 жана 2017-жылдары биз тамак-аш продукциясына жана туристтик тармакка, анын ичинде мейманкана сектору үчүн халал-сертификацияга байланыштуу үч стандартты кабыл алдык», — деп тактады.
Кайырбеков бул талаптар мейманканаларга да тараларын кошумчалады.
«Ири мейманканаларда намаз окуу үчүн атайын бөлмөлөр болушу керек. Эл аралык практикада, мисалы, Индонезияда, Малайзияда жана Тайландда, мындай мейманканалар Кааба тарапты көрсөтүүчү атайын көрсөткүчтөр менен жабдылган, ошондой эле берилген тамак-аштын бардыгы халал болушу керек», — деди ал.
