Бишкекте «Ортолук Азия - АКШ» деген аталыштагы B5+1 бизнес-форумунун экинчи күнү аяктады. Жыйынтыктоочу пленардык сессияда Кыргыз Республикасынын экономика жана соода министринин орун басары Беназир Нурланова сөз сүйлөдү.
Ал өз сөзүндө B5+1 мамлекеттик жана жеке структуралар үчүн маанилүү инструмент болуп калганын, бул регионалдык приоритеттерди конкреттүү долбоорлорго жана чечимдерге айландырууга мүмкүндүк берерин, бул форматта кызматташтыкты күчөтөрүн белгиледи.
«Ортолук Азия бүгүнкү күндө экономикалык өз ара аракеттенүү жана инвестиция тартуу үчүн бекем позицияларды ээлеп турат. Эми бизнес күн тартибинин негизги аспекттери боюнча конкреттүү кадамдар ишке ашырылып, стандарттар жакындашып, товарлардын эл аралык рынокко кирүүсү жеңилдетилип, ошондой эле трансчектик сооданы колдогон санариптик жана финансылык инструменттер өнүгүп жатат», - деди ал.
Беназир Нурланова электрондук соода жана IT-сервис үчүн жалпы санариптик мейкиндикти түзүү зарылдыгына, ошондой эле регионду бирдиктүү туристтик багыт катары биргелешип илгерилетүү маанилүүлүгүнө көңүл бурду.
Министрдин орун басары өлкөнүн негизги макроэкономикалык көрсөткүчтөрүн кыскача тааныштырды, акыркы төрт жылда экономика жылдык орточо 9-10 пайызга өскөнүн белгиледи.
«Бул мезгилде мамлекеттик кирешелер дээрлик үч эсе өстү, ал эми ички жалпы продукт 1,8 эсе көбөйдү. Бул жетишкендиктер ички тоскоолдуктарды жоюу жана бизнес үчүн шарттарды жакшыртуу боюнча туруктуу саясаттын натыйжаларын тастыктайт. Биз глобалдык экономиканын өзгөрүүлөрү жаңы чакырыктарды жаратып жатканын түшүнөбүз. Ошондуктан мамлекеттер жана бизнес биргелешип, пайда болгон тоскоолдуктарды убагында жеңип, өнүгүүнүн жаңы жолдорун табышы маанилүү», - деп кошумчалады ал.
«Биздин приоритеттерибиз өзгөрүүсүз: бул бизнес менен туруктуу диалог, региондогу макулдашылган аракеттер жана кабыл алынган чечимдерди практикалык ишке ашыруу. Биз B5+1ди узак мөөнөттүү кызматташуу катары карап, форумдун жетишкендиктерин реалдуу долбоорлорго айландырууга даярбыз», - деп жыйынтыктады ал.
