Бул форум Кыргызстан өкмөтү менен кызматташтыкта Эл аралык жеке ишкердик борбору (CIPE) тарабынан уюштурулган, максаты региондогу мамлекеттик жана жеке секторлордун ортосундагы өнөктөштүктү бекемдөө. Б5+1 форматы убактылуу демилгеден туруктуу көп тараптуу процесс болуп, экономикалык интеграцияны жана АКШ менен кызматташтыкты кеңейтүүгө жардам берет.
Форумдун катышуучулары Кыргызстан, Казакстан, Өзбекстан, Тажикстан жана Түркмөнстан өкмөттөрүнүн өкүлдөрү, ошондой эле АКШдан келген жогорку профилдүү делегаттар, бизнес ассоциацияларынын жетекчилери, финансылык институттар жана эксперттер болуп саналат.
Эки күндүн ичинде катышуучулар Борбордук Азиядагы инвестициялык климатты жана бизнес чөйрөнү жакшыртуунун маанилүү аспектилерин талкуулашат. Талкууланчу негизги темаларга айыл чарбасын, туризмди, финансылык секторду, транспортту жана логистиканы өнүктүрүү, ошондой эле электрондук соода жана IT-технологиялар боюнча маселелер, критикалык маанидеги минералдар боюнча кызматташтык кирет.
Форум мамлекеттик органдар менен бизнес өкүлдөрүнүн ортосунда панелдик талкуулар жана ачык диалогдорду камтыйт. Б5+1 регионалдык жумушчу топторунун жетекчилери жаңыланган бизнес күн тартибин жана регулятордук саясатты жакшыртуу боюнча сунуштарды сунушташат. Борбордук Азия өлкөлөрүнүн делегациялары сунушталган демилгелерди ишке ашыруу боюнча өз позицияларын билдирет деп күтүлүүдө.
Маалымат үчүн: B5+1 платформасы Борбордук Азиядагы беш өлкөнү — Казакстан, Кыргызстан, Тажикстан, Түркмөнстан жана Өзбекстанды, ошондой эле АКШны бириктирген дипломатиялык C5+1 платформасынын бизнес аналогу болуп саналат. Ал региондогу экономикалык кызматташтыкты илгерилетүү жана мамлекеттик жана жеке секторлордун ортосундагы диалогду өнүктүрүү үчүн түзүлгөн. B5+1 бизнесмендерге жана мамлекеттик кызматкерлерге инвестицияларды тартууга, инновацияларды жана экономикалык өсүүнү камсыз кылууга багытталган чечимдерди биргелешип иштеп чыгуу үчүн уникалдуу мүмкүнчүлүк берет.
B5+1 демилгеси Эл аралык жеке ишкердик борбору (CIPE) тарабынан АКШнын Мамлекеттик департаменти тарабынан колдоого алынган «Борбордук Азиядагы бизнес чөйрөсүн жакшыртуу» (IBECA) программасынын алкагында ишке ашырылууда.
Биринчи B5+1 форумы 2024-жылдын 14-15-мартында Алматыда өтүп, Борбордук Азия менен АКШнын ортосундагы экономикалык интеграцияны тереңдетүү жолунда маанилүү кадам болуп калды.
