Переговорлор учурунда Касымалиев Кыргыз Республикасы Бириккен Араб Эмирликтери менен кызматташууну өзүнүн тышкы саясатынын маанилүү аспекттеринин бири катары карай турганын, айрыкча Абу-Даби өнүктүрүү фонду менен өз ара аракеттенүү боюнча айтып өттү.
Жолугушууда инфраструктураны өнүктүрүүгө, ошондой эле инвестициялар жана экспорт үчүн шарттарды жакшыртууга багытталган биргелешкен долбоорлорду ишке ашыруу мүмкүнчүлүктөрү талкууланды.
Тараптар «Абу-Даби Кыргыз Инвестмент» ачык акционердик коомунун алкагында активдүү кызматташууну улантуу боюнча макулдашышты.
Касымалиев инвестициялык демилгелерди ийгиликтүү ишке ашыруу аталган коомдун алкагында Кыргызстандын жана БАЭнин ортосундагы мамилелерде жаңы этапка айланарын ишеним менен билдирди. Ал эми эмираттык тараптын өкүлдөрүн 2026-жылдын апрель айында Бишкекте өтүүчү «Араб өлкөлөрүнүн Залив кызматташтык кеңеши - Борбордук Азия» инвестициялык форумуна катышууга чакырды.
Абу-Даби өнүктүрүү фондунун башкы директору Мохаммед Сейф Аль-Сувейди болсо Кыргыз Республикасында ишке ашырылып жаткан долбоорлорго өзгөчө көңүл бурууга даяр экенин билдирип, фондго биргелешкен иш үчүн потенциалдуу идеяларды жөнөтүүнү сунуштады.
