Кыргыз фондулук биржасы (КФБ) Евразия өнүктүрүү банкынын (ЕАБР) колдоосу менен IT-инфраструктурасын модернизациялоо жана Quik программалык камсыздоосун киргизүү тууралуу жарыялады. Бул тууралуу КФБнын басма сөз кызматы билдирди.
КФБнын директорлор кеңешинин төрагасы Талант Омуралиевдин айтымында, 2026-жылы биржа маанилүү технологиялык прогресске жетүүнү көздөп жатат.
«Биз мобилдик тиркемелер аркылуу ар бир жаранга фондулук инструменттерге жеткиликтүүлүктү камсыз кылган заманбап экосистеманы түзүп жатабыз. Бул биздин өлкөнүн финансылык рыногунун инвестициялык тартымдылыгын кыйла жогорулатат», - деди ал.
КФБнын директорунун милдетин аткаруучу Аида Чодулова биржанын экономикада маанилүү роль ойнорун кошумчалады: компаниялар керектүү инвестицияларды алышат, жеке адамдар узак мөөнөттүү жыйноолорун өстүрүү үчүн ишенимдүү жолдорду табышат, ал эми мамлекет КФБны стратегиялык демилгелерди каржылоонун жана туруктуу өнүгүүнү камсыз кылуунун эффективдүү механизми катары пайдаланат.
2026-жылы КФБ ошондой эле валюталык жана товардык сегменттерди активдештирүүнү жана кымбат металлдар тармагында жаңы долбоорлорду сунуштоону пландап жатат.
