24-январга карата, Севастопольская көчөсү, 8; Славянская көчөсү, 6/1; Фурманова көчөсү, 13 даректериндеги бир нече курулуш объектилеринде мыйзам бузуулар катталган.
14 кабаттуу турак комплекси курулганда курулуш нормалары жана техникалык коопсуздук талаптары сакталбай жатканы аныкталды. Курулуш иштерин жүргүзүү учурунда стандарттардан көптөгөн четтөөлөр да табылган.
«Объекттин ичинде подрядчы тарабынан офис жайлары жабдылып, жарандарды кабыл алуу уюштурулган. Бул объект өндүрүштүк коопсуздук деңгээли жогору категорияга киргендиктен, мындай аракеттер мыйзам бузуу катары бааланат», - деп билдиришти ведомстводон.
Текшерүүнүн жыйынтыгы боюнча ОсОО «Зам Зам билдинг»ге административдик айыппул салынды, жана компаниянын лицензиясын токтотуу маселеси комиссиянын жыйынында каралды.
Комиссия 2026-жылдын 23-январында «Зам Зам билдинг» курулуш компаниясынын лицензиясын 90 күнгө убактылуу токтотуу чечимин кабыл алды.
Маалымат:
Адилет министрлигинин маалыматына ылайык, ОсОО «Зам Зам билдинг» 2022-жылы катталган. Абдукарим уулу Канатбек компаниянын жетекчиси, ал эми негиздөөчүлөр Парпиев Дурусбек Усупбекович жана Абдукарим уулу Канатбек болуп саналат.
Көп кабаттуу ЖК Asia City, Севастопольская көчөсү, 8
