Банковдук карталарды сатып алган делдал кармалды
Чүй облусунда банковдук карталарды колдонуу менен ири алдамчылыкка шектелген адам кармалды. Бул тууралуу облустук ички иштер башкармалыгынан билдиришти.
Маалыматка ылайык, 2026-жылдын 5-февралында Ысык-Ата районунун ички иштер органдарына 1981-жылы туулган К.А. аттуу жаран кайрылып, белгисиз адамдардан WhatsApp аркылуу төрт сандык кодду билдирүүнү сурашканын айтты. Натыйжада, анын электрондук капчыгынан 1 миллион 999 миң 6 сом уурдалган.
Бул факт боюнча Кыргыз Республикасынын Кылмыш кодексинин 209-беренеси боюнча кылмыш иши козголду.
Оперативдик иш-чаралардын жүрүшүндө 1984-жылы туулган Т.Э. аттуу шектүү аныкталды. Ал Telegram мессенджерин колдонуп, жарандардан банковдук карталарды сатып алып, аларды криптовалюта биржалары менен иштөө үчүн колдонорун билдирген.
Уурдалган каражаттар кармалган адам сатып алган үчүнчү жактардын банковдук картасына которулган. Бул карта башка адамдын атына катталган жана мыйзамсыз максаттарда акчаны чыгаруу жана которуу үчүн колдонулган.
Делдал кармалып, убактылуу кармоо жайына жайгаштырылды. Тергөө уланууда.
сүрөт www
